रत्ननगर/रोजगारीको अवसरको खोजीमा रहेका तथा आफ्नो वृत्ति विकासको मार्ग पहिचान गर्न चाहने युवायुवतीका लागि नेपाल सरकार तथा स्वीस सरकार बीचको द्विपक्षीय सम्झौता अनुसार संचालित दिगो तथा सम्मानित रोजगारीका लागि सीप परियोजना–दोस्रो चरण, हेल्भेटास नेपालको प्राविधिक सहयोगमा रत्ननगर नगरपालिका र भरतपुर महानगरपालिकाको संयुक्त आयोजनामा २ दिने वृत्ति मार्ग—निर्देशन तथा रोजगार मेलाको शुरु भएको छ ।

मेलाको रत्ननगर नगरपालिकाका प्रमुख प्रलाद सापकोटाले एक कार्यक्रमका बीच उद्घाटन गर्नुभएको थियो । सापकोटाले श्रम बजारमा रोगजारीको पहिचानको लागि मेला आयोजना गरिएको बताउनुभयो । मेलामा ३४ वटा स्टल रहेका छन् भने मेलाको करिब ५ हजार जनाले अबलोकन गर्ने, २ हजार जनाले बृत्ति परामर्श तथा ५० देखि १०० जना वेरोजगार युवाले रोजगारी प्राप्त गर्ने मेयर सापकोटाले बताउनुभयो ।

रत्ननगर नगरपालिका र भरतपुर महानगरपालिकाको संयुक्त आयोजनामा होटल स्टार चितवन, रत्ननगर–१, चितवनमा हुन गईरहेको वृत्ति मार्ग—निर्देशन तथा रोजगार मेलामा सहभागी भई आफूले चाहेको सीप तथा रोजगारीका अवसरहरुको बारेमा जानकारी लिनुहोस् ।

रत्ननगर नगरपालिकाका उपमेयर यादव प्रसाद पाठकले स्वागतसँगै कार्यक्रमको उद्देश्यमाथि प्रकाश पार्नुभएको कार्यक्रममा उद्योग वाणिज्य संघ चितवनका बरिष्ठ उपाध्यक्ष सुमन कुमार श्रेष्ठ, चितवन उद्योग संघ रत्ननगर समितिका अध्यक्ष गोविन्द प्रसाद खनाल, रत्ननगर उद्योग वाणिज्य संघका बरिष्ठ उपाध्यक्ष शंकर गिरी लगायतले कार्यक्रमको सफलताको शुभकामना व्यक्त गर्नुभएको थियो ।

मेलाको पहिलो दिन चितवन उद्योग संघको स्टलमा ६६ जना, गढी सेक्यूरिटी सर्भिसको स्टलमा ३६, उद्योग वाणिज्य संघ चितवनको स्टलमा ३६, सपना कफी एण्ड बरिस्टाइजको स्टलमा १७, सेन्ट्रल कलेजको स्टलमा २० र अन्य स्टलहरुमा गरी २५० जनाले विभिन्न पदको लागि आवेदन फारम भरेका थिए । मेलामा चितवन उद्योग संघका सदस्य उद्योगहरु र वस्तुगत संघहरुमा आवद्ध उद्योगबाट विभिन्न पदहरुमा आवश्यक १२२३ जनशक्तिहरुको मागको विवरणलाई प्रस्तुत गरिएको थियो । जसमध्ये मेलाको पहिलो चितवन उद्योग संघको स्टलमा ६६ जनाले रोजगारीको लागि फारम भरेका थिए । संघको स्टलमा आवेदन दिनेहरु मध्ये केही आवेदकहरुलाई रोजगारीको लागि प्रारम्भिक अन्तवार्ता समेत लिइएको थियो ।