चितवन/देशमा चरम आर्थिक मन्दीका कारण व्यापार र व्यवसायिक गतिविधिमा ह्रास आएको भन्दै शुक्रबार सबै घरधनीहरुलाई उद्योग वाणिज्य संघ चितवनले घर भाडा सकभर नबढाउन र छुट दिन अपिल गरेको छ ।
‘औद्योगिक उत्पादन तथा वितरण अत्यन्त सुस्त भएका कारण सर्वसाधारणको दैनिकी समेत अप्ठ्यारोे परिस्थितिबाट गुज्रिरहेको, बैँक तथा वित्तीय संस्थाहरुले लिने गरेको चर्को बैँक ब्याजदरका कारण व्यवसायी ठूलो मारमा परेको. आर्थिक जटिलताका कारण व्यापार व्यवसाय सुचारु रुपमा सञ्चालन हुन नसक्दा र सर्वसाधारणको आयआर्जनमा समेत बृद्धि नहुँदा उद्यमी व्यवसायी प्रभावित भएका छन् ।
त्यस्तै घर बहाल सम्झौता बमोजिम यस वर्ष घरबहालमा वृद्धि गर्ने समय आएका घरधनीहरुले यो समयमा घरभाडामा वृद्धि नगरी राहत प्रदान गर्न संघले सबैमा अपिल पनि गरेको छ । संघले आगामी दिनमा आउन सक्ने आर्थिक संकटलगायत व्यवसायिक समस्या समाधानार्थ व्यवसायीहरुसँगै रही परिस्थितिको सामना गर्नको लागि सदैव तत्पर रहने प्रतिबद्धता समेत ब्यक्त गरेको छ ।
संघले चितवनका विभिन्न व्यापारिक केन्द्रमा घर/सटर बहालमा लिई व्यवसाय गर्ने व्यवसायीहरु र घर बहालमा आश्रित घरधनीलाई समेत अप्ठ्यारोे परेको जनाएको छ । यस्तो परिस्थितिमा घर बहालमा लिने र दिने दुवै पक्ष आपसी समझदारीमा रही अवस्था सहज नहँदासम्मको लागि घर भाडामा केही प्रतिशत छुट दिन संघको माग छ ।
