काठमाडौं/उद्योगीहरूले गेडागुडीको कच्चा पदार्थमा भन्सार बढी भएको भन्दै घटाउन माग गरेका छन् । अहिले लगाइदै आएको भन्सारले उद्योगलाई टिक्न नसक्ने स्थिति आएको भन्दै त्यसलाई हटाउनु पर्ने बताइएको छ । आइतबार पत्रकार सम्मेलन गरेर नेपाल चामल तेल दाल उद्योग संघले तयारी र कच्चा गेडागुडीमा एउटै भन्सार भएकोले समस्या आएको जानकारी दिएको हो ।
नेपाल चामल तेल दाल उद्योग संघका अध्यक्ष सुबोधकुमार गुप्ताले सरकारले बन्द हुन लागेका उद्योगलाई जीवन दिनुपर्ने बताए । नेपालमा भारतको खाद्य वस्तु मात्र आउने भएकाले त्यसलाई कम गर्न पनि देशका उद्योगहरूलाई संरक्षण गर्नुपर्ने उनले बताए । “नेपाल भारतीय बजारको रूपमा परिचित हुँदै गएको छ । युवा विदेशीएका छन् । गाउँमा खेतबारी बाँझो छ,” उनले भने, “सरकारले उचित नीति ल्याए खाद्यान्नमा आत्मनिर्भर मात्र नभएर निर्यात पनि गर्न सकिन्छ । दालका उद्योग धेरै बन्द भएका छन् । २०–२५ % मात्र सञ्चालनमा छन् । कच्चादाल तथा गोडागुडी आयातमा सहुलियत दिनुपर्छ ।”
बोडरमा सीसीटीभी राखेर तोरी निकासीलाई कडाइँ गर्नुपर्ने पनि बताइएको छ । तेलमा लाग्दै आएको १३ % भ्याट खारेज गर्न पनि माग गरिएको छ । बैंकको प्रिमियम दुई प्रतिशतभन्दा बढी राख्न नहुने पनि बताएको छ । त्यस्तै संघका पूर्वअध्यक्ष कुमुद दुगडले तथ्यांक नहुँदा पनि समस्या उत्पन्न भएको बताए । “डाटा नहुँदा समस्या भएको छ । हाम्रो तथ्यांक नै सम्पत्ति हो । हाम्रो सिस्टममा डाटा नहुँदा कसले कति कहाँबाट उत्पादन हुन्छ, भन्ने कुरा नै छैन । कृषि भूमि छुट्याउन आवश्यक छ,” उनले भने । जमिन बाँझो राख्न नपाउने भन्ने नीति कडाइँका साथ लागु गर्नुपर्ने बताइएको छ ।
