लमजुङ/दोस्रो राइनास कप खुल्ला फुटबल प्रतियोगिता २०७९ को उपाधि रोयल फ्रेण्डसिप युवा क्लव लमजुङले जितेको छ । मंगलवार भएको फाइनल खेलमा कालिका युवा क्लव भण्डारथोक गोरखालाई शुन्यका विरुद्ध दुई गोलले हराउदै रोयल फ्रेण्डसिपले प्रतियोगिताको उपाधि जितेको हो ।

लमजुङको राइनास नगरपालिका ६ धमिलिकुवा स्थित गौलीटार क्षेत्रीय खेल मैदानमा यहि फागन १० गतेदेखि सुरु भएको प्रतियोगितामा लमजुङ, गोरखा र तनहुँका १८ टिम सहभागि थिए । सेमिफाइनल खेलमा मर्स्याङदी युवा क्लव हवाईग्राउण्डलाई हराउदै कालिका भण्डारथोक फाइनलमा प्रवेश गरेको थियो भने विवाईसी भोटेओडार हराउदै रोयल फ्रेण्डसिप फाइनलमा प्रवेश गरेको हो ।

प्रतियोगिताको विजेता रोयल फ्रेण्डसिपले  २ लाख नगद सहित कप, मेडल र प्रमाणपत्र हात पारेको छ भने उपविजेता कालिकाले नगद १ लाख रुपैयाँ, कप, मेडल र प्रमाणपत्र पाएको छ । प्रतियोगितामा रोयल फ्रेण्डसिपका रोसन क्षेत्री सर्वाधिक गोलकर्ता, सागर गुरुङले उत्कृष्ट खेलाडी र लिलजंग तामाङले उत्कृष्ट खेलाडीको उपाधि पाएका छन् । तिनै जनालाई प्रमाणपत्र र पाँच/पाँच हजार नगद पुरस्कार दिइएको आयोजक गौलिटार क्षेत्रिय खेल मैदान समिति अध्यक्ष किरण श्रेष्ठले वताउनुभयो । उहाँका अनुसार हरेक खेलमा ‘म्यान अफ दि म्याच’ घोषणा गरि १/१ हजार रुपैयाँ दिइएको छ ।

यसैगरी सेमिफाइलन पुग्ने दुई टिम मर्स्याङदी हवाईग्राउण्ड र विवाईसी भोटेओडारलाई पुरस्कार स्वरुप नगद २०÷२० हजार रुपैयाँ प्रदान गरिएको छ । हरेक खेलमा ‘म्यान अफ दि म्याच’ घोषणा गरि १ हजार रुपैयाँ दिइएको थियो । प्रतियोगिताका विजयी टिम तथा खेलाडीलाई गण्डकी प्रदेश सभा सदस्य डा. टकराज गुरुङले पुरस्कार वितरण गर्नुभएको छ ।

प्रदेशसभा सदस्य डा.गुरुङको प्रमुख आतिथ्यतामा भएको पुरस्कर वितरण तथा प्रतियोगिताको समापन कार्यक्रममा राइनास नगरप्रमुख खड्गवहादुर गुरुङ, उपप्रमुख पुष्पराज खनाल, प्रमुख प्रशासकिय अधिकृत गोकर्णराज सुयल, राइनास ६ का वडाअध्यक्ष गोविन्दराज चिलुवाल, नेपाली कांग्रेस लमजुङका पुर्व सभापति तुलसीनारायण श्रेष्ठ, विभिन्न राजनितिक दलका प्रतिनिधि, क्लवका पूव पदाधिकारी, स्थानीय समाजसेवी लगायतको उपस्थिती रहेको थियो ।

गौलिटार क्षेत्रिय खेलमैदान समितिका अध्यक्ष किरण श्रेष्ठको अध्यक्षतामा भएको समापन कार्यक्रमको सञ्चालन समितिका सचिव सिताराम पाण्डेले गर्नुभएको थियो ।