भरतपुर/चितवन उद्योग संघ र नेपाली जुत्ता घरको संयुक्त आयोजनामा “प्रथम चितवन फुडवेयर एक्स्पो–२०७९” को हुने भएकाे छ । चितवन उद्योग संघका बरिष्ठ उपाध्यक्ष सूर्य प्रसाद न्यौपानेको अध्यक्षतामा सम्पन्न कार्यक्रममा नेपाल फुटवेयर एशोसिएसनका अध्यक्ष नानीराज घिमिरे प्रमुख अतिथि रहनुभएको थियो ।

कार्यक्रमका प्रमुख अतिथि घिमिरेले स्वदेशी उत्पादनका बारेमा आम उपभोक्तालाई स्थलगत अबलोकन गराई आफ्ना उत्पादका बारेमा जानकारी गराउने, स्वदेशी उत्पादनलाई प्रबद्र्धन गर्न प्रदर्शनी मेलाको माध्यमबाट ब्यापक प्रचार प्रसार गरी बाह्य बजार समेत बिस्तार गर्न रणनीतिक पहल गर्ने, बिदेशी जुत्ता चप्पल तथा छालाका बस्तुहरुको आयातलाई प्रतिस्थापन गरी जुत्ता चप्पल तथा छालाका बस्तु उत्पादनका क्षेत्रमा मुलुकलाई आत्म निर्भर बनाउन आधार तयार गर्ने, वास्तविक उपभोक्तासंँग उत्पादकहरुले प्रत्यक्ष भेटी उनीहरुका गुनासा तथा राय सुझाव संकलन गरी कमी कमजोरीलाई सच्याउँदै आफ्ना उत्पादनहरुमा सुधार ल्याउन र प्रतिस्पर्धात्मक क्षमता अभिवृद्धि गर्ने लगायतका विषयमा जानकारी गराउनु भएको थियो ।

चितवन उद्योग संघका बरिष्ठ उपाध्यक्ष सूर्य प्रसाद न्यौपानेले स्वागत मन्तव्य सहित कार्यक्रमको उद्देश्य माथि प्रकाश पार्नुभएको कार्यक्रममा नेपाली जुत्ता घरका अध्यक्ष होमनाथ उपाध्यायले विज्ञप्ति मार्फत प्रदर्शनीको जानकारी गराउनु भएको थियो ।

निःशुल्क प्रवेश रहेको प्रदर्शनीमा नेपालमा उत्पादित जुत्ता चप्पल तथा छाला जन्य वस्तुहरु र स्वदेशी तयार गरिएका जुत्ता चप्पल, लेडिज जेन्स बच्चा सबैलाई समेट्ने गरि अहिले गर्मी मौषम (Summer season) लाई लक्षित गरि उत्पादन रहने छन् भने विशेष आकर्षक छुटमा १० भन्दा बढी ब्राण्डका ५०० मोडलका जुत्ता एकै ठाँउमा पाउन सकिने जानकारी गराइएको थियो ।