काठमाडौं/ काठमाडौँ प्रवेश गर्ने मुख्य नाका नागढुङ्गा नौबिसे सडक खण्डमा गाडीहरुको लामो जाम लागेको छ । यो सडक खण्ड अन्तरगत झ्याप्ले खोलामा भारतीय नम्बर प्लेटको मालवाहक ट्रक बिग्रिएकाले बिहानदेखि नै चाप परेको छ । सामान बोकेर काठमाण्डौका लागि छुटेको ट्रक बिहान बिग्रिएको हो ।यो सडक खण्डमा अहिले एकतर्फी मात्रै गाडी चलिरहेका छन् । यसले गर्दा जाम भएको छ । बिग्रिएको ट्रकमा सामान धेरै भएकाले हटाउन पनि समस्या भएको नागढुङ्गामा खटिएका प्रहरी निरीक्षक टपेन्द्र खत्रीले जानकारी दिए । गाडी बनाउन समय लाग्ने भएकाले अझै केही घण्टा यो सडक खण्डमा चाप पर्ने अनुमान छ । यो सडक खण्ड हुँदै हजारौं गाडी ओहोरदोहोर हुने भएकाले सामान्य समस्या हुँदा पनि जाम हुने गरेको छ ।