भरतपुर/नव जनजागृति बचत तथा ऋण सहकारी संस्था भरतपुर १३, पृथ्विनगरले स्थापना दिवस मंगलबार मनाएको छ। पुरस्कार तथा सम्मान वितरण, रक्तदान सहित विविध कार्यक्रम गरी सहकारीले १७औं स्थापना दिवस मनाएको हो ।
सो अवसरमा जेष्ठ शेयर सदस्य, उच्चतम वचत, ऋण कर्ता सहित असल ऋण कर्ता गरी १३ जनालाई सम्मान गरिएको संस्थाका सचिव बलराम पौडेलले जानकारी दिए । उच्चतम वचत कर्ता तर्फ नवराज सापकोटा, महेश्वर सापकोटा, राधिका खनाल र हिमालय दण्डपाणी न्यौपाने माध्यामिक विद्यालयलाई सम्मान गरिएको थियो । पौडेलका अनुसार उच्चतम ऋण तर्फ रमा देवी अधिकारी, जमुना अधिकारी र इन्द्र घिमिरे सम्मानित हु्दाँ असल ऋण कर्ता तर्फ मैना सन्यासी, विजय ओझा र दिनेश भन्द्र पण्डित सम्मानित भएका थिए । संस्थाले ७० वर्ष पुरा गर्नुभएको चन्द्रकला अधिकारी, विष्णु प्रसाद अर्याल र तारानाथ सुवेदीलाई जेष्ठ शेयर सदस्यका रुपमा सम्मान गरेको थियो ।
प्रमुख अतिथि जिल्ला सहकारी संघ, चितवनका अध्यक्ष हरि प्रसाद पौडेल र नव जनजागृति बचत तथा ऋण सहकारी संस्थाका अध्यक्ष खिलराज रेग्मीले सम्मानीतहरुलाई खादा ओढाई सम्मान पत्रले सम्मान गरेका थिए ।
कार्यक्रममा बोल्दै प्रमुख अतिथि पौडेलले समुदायमा आधारित वचत तथा ऋण सहकारी संस्था कहिल्यै नडुब्ने बताए । पछिल्लो समयम वचत तथा ऋण सहकारीका विषयमा प्रश्न उठेको भएपनि नव जनजागृति जस्ता समुदायमा आधारित सहकारीमा मानिसहरुको आकर्षण बढेको भन्दै पौडेलले भने सहरमा नचिनेका संचालक र फरक पृष्ठ भुमिभएका व्यक्तिहरुका कारण केही सहकारी जोखिममा परेका छन् । तर समुदायमा आधारीत सहकारी वषौं सम्म रहन्छन् ।

कार्यक्रममा नव जनजागृति बचत तथा ऋण सहकारीका संस्थापक अध्यक्ष एवम् जिल्ला सहकारी संघ, चितवनका निवर्तमान अध्यक्ष हरिश्चन्द्र सुवेदीले संस्थाको ईतिहास बारे जानकारी गराएका थिए ।उनका अनुसार भरतपुर १३ को एक मात्र वचत तथा ऋण सहकारीको रुपमा परिचित नव जनजागृति बचत तथा ऋण सहकारी संस्था ८४ जना पशुपालक किसानहरुले २०५४ सालमा मासिक ५० रुपैयाँ वचत गर्दै व्यापार समूहको रुपमा सुरु भएको थियो ।
अहिले यस सहकारीमा १३ सय बढी सदस्यहरु छन् भने १३ कारोड बढि पूँजी छ। वचतसँगै सहकारीले अहिले व्यवसायीक, कृषि र वैदेशीक रोजकारीको लागि ऋण लगानी गर्दै आएको छ। भरतपुरकै ग्रामीण भेगमा सहकारीले भावी दिनमा डिजिटल बैंकिङ्ग कार्य समेत सुरु गर्ने अवधारणमा रहेको छ।
नव जनजागृति बचत तथा ऋण सहकारी संस्थाका अध्यक्ष खिलराज रेग्मीको अध्यक्षतामा भएको कार्यक्रममा संस्थाका उपाध्यक्ष भानुभक्त सुवेदीले स्वागत मन्तव्य राखेका थिए । संस्थाले स्थापना दिवसकै अवसरमा आयोजीत रक्तदान कार्यक्रममा १० महिला सहित ४७ जनाले रक्तदान गरेका थिए । केन्द्रिय दुग्ध सहकारी संघका उपाध्यक्ष भागिरथ तिमल्सेनाले ५२औं पटक रक्तदान गर्दै रक्तदान कार्यक्रमको शुभारम्भ गर्नुभएको थियो । अध्यक्ष रेग्मीले सेयर सदस्यका हितका लागि आफ्नो नेतृत्व निरन्तर लाग्ने बताएका थिए ।