चितवन/नारायणी नदी किनारमा आज (बिहीबार)देखि साङ्ग–बिराट्–श्रीगायत्री कोटिहोम ज्ञानमहायज्ञ सुरु भएको छ । एक महिनासम्म चल्ने महायज्ञको शहरी विकास मन्त्री विक्रम पाण्डेले उद्घाटन गर्नुभएको छ । उद्घाटन कार्यक्रममा बोल्दै मन्त्री पाण्डेले विश्व शान्तिका लागि महायज्ञ गर्न लागिएको बताउनुभएको छ । ‘यो यज्ञ हिन्दुहरुको लागि मात्र गरेको होइन । विश्व मावन जातिको शान्तिका लागि हामीले गर्न लागेको यज्ञ हो,’ उहाँले भन्नुभयो, ‘कुनै जात र लिङ्गका लागि गरिएको होइन ।’ ऋषिहरुले तपस्या गरेको भूमिमा गर्न लागिएको महायज्ञमा देशभरका भक्तजनहरुले आएर पुण्य प्राप्त गर्न सक्ने उहाँले बताउनुभयो । यस महायज्ञले विश्वका मानव जातिलाई सफलता मिल्ने विश्वास समेत लिनुभएको छ । उहाँले पूर्ववत रुपमा शान्तिको कामना समेत गर्नुभएको छ । धर्मको संरक्षण गरे मानवको रक्षा हुने उहाँको भनाई छ ।
सल्लाहाकार उमाशंकर अग्रवालले धर्म संरक्षण गर्न कोटीहोम गरिएकाले आएर उपस्थिती भैदिन अनुरोध गर्नुभयो । पुर्वसांसद गोविन्द कंडेलले नेपालीले आफ्नो आचारण भुल्दै गएकाले सम्पुर्ण भक्तजन मिलेर महायज्ञ समपन्न गर्न सुझाव दिनुभएको छ । स्वामी जगन्नाथ शर्मा कंडेलले समयसंगै यज्ञहरुको गर्ने प्रक्रिया परिवर्तन हुँदै गएकोमा चिन्ता व्यक्त गर्नुभयो ।
महायज्ञ सम्पन्न गर्न साढे दुई करोड रुपैयाँ खर्च हुने अनुमान गरिएको छ । दैनिक होमनका लागि ७ क्वीटल अन्न खर्च हुने प्रमुख कथा बाचक परशुराम पाण्डेले जानकारी दिनुभयो । फागुन १२ गतेसम्म सञ्चालन हुने महायज्ञलाई एक करोड ४९ लाख ८५ हजार बत्ति बालिने लक्ष्य राखिएको छ । महायज्ञमा १०८ कर्मनिष्ठ ब्राह्मण पु्जा पाठमा सहभागि हुनेछन् । महायज्ञको उद्घाटन पुर्व र्याली समेत निकालिएको थियो ।
