चितवन/ भरतपुर २ क्षेत्रपुरमा अवस्थित सिद्धि विनायक बचत तथा ऋण सहकारी संस्था लि.ले शेयर सदस्य अनुकूल गैह्रेलाई राहत स्वरुप दश हजार नगद प्रदान गरेको छ । संस्थाले संचालन गरेको जीवन सुरक्षा कोष अन्तर्गत सदस्य कल्याण कोष मार्फत गैह्रेलाई मंगलबार सो रकम हस्तान्तरण गरेको हो ।
शेयर सदस्य स्वर्गीय मना गैह्रेले विमा वापतको रकम कम्पनीले नदिएपछि सामाजिक उत्तरदायित्व वहन गर्दै उनलाई उक्त रकम उपलब्ध गराइएको संस्थाका व्यवस्थापक विकास पौडेलले जानकारी दिए । उनी स्वर्गीय गैह्रेका सुपुत्र हुन् ।
यसअघि सम्पन्न भएको १५औं वार्षिक साधारण सभाबाट शेयर सदस्यको हितलाई मध्यनजर गर्दै सदस्य कल्याण कोष संचालनमा ल्याइएको व्यवस्थापक पौडेलले बताए । कल्याण कोषले सदस्यहरुलाई अप्ठ्यारो अवस्थामा राहत स्वरुप सहयोग गर्ने उद्देश्यले सुरु गरिएको उनको भनाइ छ । सदस्य कल्याण कोष यसअघि संस्थाले दैवी राहत कोषबाट संचालन गर्दै आएको थियो ।
कार्यक्रममा संस्थाका सचिव मुकुन्दप्रसाद गौतम, राहत वितरण उपसमितिका संयोजक रामप्रसाद घिमिरे, सदस्य भुवन उप्रेती लगायतको उपस्थिति रहेको थियो । २०६५ सालमा स्थापना भएको संस्थामा करिब १८ सय सदस्य रहेका छन् ।