नारायणगढ/चीनको युआन प्रान्तबाट शुरु भएको कोरोना भाइरस (कोभिड–१९) ले यतिबेला विश्वलाई नै त्रसित बनाएको छ । जसका कारण विश्वकै अर्थतन्त्रले ठूलो क्षति व्यहोर्नु परेको अवस्था छ ।
नोभेल कोरोना भाइरस संक्रमण रोकथाम तथा नियन्त्रण पूर्व तयारी गर्ने उद्देश्यका साथ नेपाल सरकारले अहिले देशभरी नै लगडाउन गरेको यस अवस्थामा दैनिक रोजगारी गरेर जीवनयापन गरिरहेका विपन्न वर्गका परिवारहरुलाई विभिन्न क्षेत्रबाट सहयोगहरु दिने कार्यहरु पनि चलिरहेको छ ।
यसै सन्दर्भमा होटल व्यवसायी संघ–चितवनको आयोजनामा आफू पनि सजग रही, अरुलाई पनि सुरक्षित राखौ साथै नियमित साबुन पानीले हात धोई सामाजिक दुरी कायम गरौं भन्ने मूल नाराका साथ लकडाउनका कारण विपद्मा परेका मजदुर तथा विपन्न वर्गहरुका लागि निःशुल्क खाना वितरण गरिएको थियो ।
खाना वितरण कार्यक्रममा होटल व्यवसायी संघ–चितवनका पदाधिकारी एवं पूर्व अध्यक्ष एवं लायन्स क्लव अफ नारायणीका पदाधिकारीहरुको समेत सहभागिता रहेको होटल व्यवसायी संघ–चितवनकी अध्यक्ष शर्मिला न्यौपानले जानकारी दिनुभयो । हिजो शनिबार दुईसय ३० र आज आइतबार दुईसय ८५ जनालाई खाना खुवाईएको अध्यक्ष न्यौपानेले जानकारी दिनुभयो ।
