आँबुखैरेनी/ तनहुँ जिल्लाको उच्च भूमिमा रहेको छिम्केश्वरी माध्यमिक विद्यालयको हीरक जयन्ती यहि पुस २५ गतेदेखि २८ गते सम्म विविध कार्यक्रम गरि मनाउन थालेको छ । सोमबाट हीरक जयन्तीको आँबुखैरेनी गाउँपालिका वडा नम्बर ४ का वडा अध्यक्ष मिलन भुजेलले उद्घाटन गर्नुभएको छ । उहाँले ६० वर्ष पुगेको विद्यालयको हीरक जयन्ती उद्घाटन गर्नपाउनु सुखद पक्ष रहेको बताउँदै यहाँको शैक्षिक सुधारका लागि आफूले सकेको सहयोग गर्ने बताउनुभयो ।

कार्यक्रममा विद्यालयका प्रधानाध्यापक राजेन्द्र न्यौपानेले शिक्षाको विकास विना अरु विकास सम्भव नभएकोले शिक्षालाई प्राथमिकता दिइनुपर्ने बताउनुभयो । धेरै अमूल्य विषय र बस्तु छिम्केश्वरी क्षेत्रमा भएपनि यसलाइ बजारीकरण गर्न नसक्दा यस क्षेत्रका नागरिकहरु रोजगारका लागि अन्यत्र जानुपर्ने बाध्यता रहेको उहाँको भनाइ छ । यस क्षेत्रलाइ पर्यटनको विकासबाट अघि बढाउनुपर्ने उहाँको भनाइ छ । विद्यालय व्यवस्थापन समितिका सदस्य देवनारायण खवासले यस क्षेत्रमा शिक्षाको विकास नयाँ ढँगले अघि बढेको बताउनुभयो ।

विद्यालय व्यवस्थापन समितिका अध्यक्ष जुद्ध बहादुर थापाको अध्यक्षतामा सुरु भएको कार्यक्रम पुस २८ गते समापन हुने विद्यालयका सूचना अधिकारी काशीनाथ देवकोटाले बताउनुभयो । नियमित पठनपाठनसँगै विद्यार्थीको अतिरिक्त क्षमता विकास लागि विद्यालयले काम गर्दै आइरहेको उहाँको भनाइ छ ।