गैँडाकोट/जलुके खानेपानी तथा सरसफाई उपभोक्ता संस्था लिमिटेड गैँडाकोटको २१ औँ वार्षिक साधारण सभा सम्पन्न भएको छ । संस्थाको ९ लाख ५० हजार लिटर पानी भण्डारण क्षमता रहेको छ । हालसम्म ४ वटा टंकीबाट पानी भण्डारण एवं वितरण गर्दै आइरहेको संस्थाले १० करोडको लागतमा प्रदेश र केन्द्र सरकारको सहयोगमा खानेपानी टंकीको डिपीआर निर्माण गरी कामलाई दु्रत गतिमा अगाडी बढाइरहेको छ ।
कार्यक्रममा बोल्दै गैँडाकोट नगरपालिकाका नगरप्रमुख मदनभक्त अधिकारीले पानी जीवनको आधार भएकाले स्वच्छ र स्वस्थ खानेपानी प्रत्येक नागरिकले सहज पाउनुपर्ने बताउनुभयो । पहिले सूर्यभक्त बुवाले पानीका लागि धेरे काम गरेको सम्झदै उहाँले नगरपालिकाले पनि सक्दो सहयोग गर्ने प्रतिबद्धता जनाउनुभयो ।
संस्थाका अध्यक्ष मोतिचन्द्र चालिसेले प्लाष्टिकजन्य फोहरलाई व्यवस्थापन गर्ने नीति ल्याएर अगाडी बढेको बताउनुभयो । उहाँले प्लाष्टिकलाई मेसिन ल्याएर पेल्ने र कच्चापदार्थ बनाएर बिक्री बितरण गरिने जनाउनुभएको हो । उहाँले सुरक्षित खानेपानीका लागि विभिन्न तहका सरोकारवाला र सरकारसँग सहकार्य गरेर काम गरिरहेको बताउनुभयो । प्रभावकारी रुपमा खानेपानीका दीगो व्यवस्थापन र सुरक्षित स्वच्छ खानेपानी वितरण गर्दै खानेपानीको स्रोतहरुलाई भावि पुस्ताहरुमा सुरक्षित हस्तान्तरण गर्र्दै जाने जलुके खानेपानीको उद्देश्य रहेको बताउनुभयो ।
संस्थाका सचिव विष्णुप्रसाद पंगेनीले विंस।२०४९ सालदेखि खानेपानीको आपूत्र्ति गर्न सर्वेक्षणको काम गरेको बताउँदै २०५८ सालदेखि १८ वटा सार्वजनिक धारा सहित उपभोक्तालाई हस्तान्तरण गरिएको बताउनुभयो । संस्थाले अहिले गैँडाकोट १, २ र ४ मा स्वच्छ र सुरक्षित खानेपानी वितरण गर्दै आइरहेको जानकारी दिनुभयो । उहाँले संस्थाले नेपाल राष्ट्रिय शमसेर आदर्श मावि, महेन्द्र स्मारक आधारभुत विद्यालय, नवदुर्गा आधारभुत विद्यालयमा न्युनतम शुल्कमा खानेपानीको आपूत्र्ति गर्दै आएको बताउनु भएको छ । संस्थाले न्युनतम शुल्कमा सामुदायिक विद्यालयमा ५ लाख ८४ हजार ६ सय ९७ बराबरको खानेपानीको आपूत्र्ति गरेको छ ।

संस्थाका कोषाध्यक्ष पार्वती शर्मा लम्सालले संस्थाको ०७८/०७९ मा १ करोड ८३ लाख ३१ हजार ६ सय ७७ रुपैयाँ कुल आम्दानी गरेको छ भने सो आर्थिक वर्षमा ९२ लाख ४४ हजार ८ सय ६८ रुपैयाँ खर्च भएको जानकारी दिनुभयो । साथै उहाँले चालु आर्थिक वर्षको ५ महिनामा ३७ लाख ३ हजार ९ सय ३८ रुपैयाँ ९८ पैसा छ भने ३२ लाख २३ हजार २ सय २४ रुपैयाँ ८५ पैसा खर्च भएको छ । साथै ४ लाख ८० हजार ७ सय १४ रुपैयाँ १३ पैसा बचत भएको बताउनुभयो । साथै उहाँले आर्थिक हिसाव किताव पारदर्शी सफ्टवेयर प्रयोग गरि काम गरिदै आएको बताउनुभयो ।
संस्थाका लेखा संयोजक शालिग्राम आचार्यले जलुकेले सुरक्षित र स्वस्थ खानेपानी उपलब्ध गराउन गरिरहेको कामलाई प्रभावकारी मान्न सकिने बताउनुभयो । उहाँले संस्थाले सामाजिक उत्तरदायित्व निर्वाह गर्दै काम गरिरहेको बताउँदै संस्थाले खरिद बिक्रि प्रक्रियामा आर्थिक नियमावली अनुसार काम गरेको जानकारी दिनुभयो ।
अनुगमन तथा मुल्याङ्कन समितिका संयोजक धु्रव अधिकारीले खानेपानीका धारा जडानमा अनुगमन र मुल्याङ्कन गरी वितरण गरिरहेको बताउँदै जलुके मुहानदेखि तुले डाँडा सम्मका मेन पाइप लाइन आवश्यक अनुसार फेरबदल गर्ने, प्राकृतिक स्रोतलाई अझै व्यवस्थापन र डिप बोरिङको खोजीलाई निरन्तरता दिने लगायतका भावी कार्यक्रम रहेको बताउनुभयो ।
यस्तै संस्थाका खानेपानी सुरक्षा समितिका संयोजक एकराज सापकोटाले पिउने पानीलाई सुरक्षित बनाउन विभिन्न कार्यहरु गर्दै आएको र त्यसका लागि पानी संकलन टंकीहरुमा नियमित कोलोरोयसन गरि पानीलाई सुरक्षित गरिएको जानकारी दिनुभयो । साथै उहाँले प्रत्येक ३÷३ महिनामा मुहानमा पुगी मुहान सफा गर्ने काम निरन्तर भइरहेको बताउनुभयो ।
गैँडाकोट १ का वडाध्यक्ष सुरेन्द्र रेग्मी, गैँडाकोट ४ का वडाध्यक्ष तेजप्रसाद घिमिरे, नेपाल शमशेर आर्दश माविका प्रधानाध्यापक इन्द्रराज भट्टराइ, मौलाकाली सामूदायिक वनका कोषाध्यक्ष कमल कँडेल, गैँडाकोट पम्पिङ्ग खानेपानीका अध्यक्ष कृष्णप्रसाद न्यौपाने, गैँडाकोट १ का पूर्व वडाध्यक्ष हरिप्रसाद सापकोटा लगायतका विभिन्न व्यक्तित्वहरुले जलुके खानेपानीले मुहानदेखी मुखसम्म स्वस्थ खानेपानी ल्याउन काम गरिरहेको बताउँदै संस्थाको प्रगतिको कामना व्यक्त गर्नुभयो ।
कार्यक्रममा विभिन्न सामाजिक संघ संस्थाका प्रतिनिधि, सामाजिक व्यक्तित्व, संस्थाका पूर्व पदाधिकारी, संस्थापक र अहिलेका पदाधिकारीको उपस्थिति रहेको थियो । साथै संस्थाले सुरक्षित खानेपानी र सचेतनामा टेवा पु¥याउने संस्था तथा व्यक्तिहरुलाई प्रशंसा पत्रले समेत सम्मान गरेको थियो ।
साथै संस्थाको १०आँै अधिवेशनको प्रक्रिया अघि बढेको छ । निर्वाचन समितिले २७ गते विहान १० बजेसम्मको लागि सहमतिको समय दिएको निर्वाचन समिति संयोजक शोभाकान्त काफ्लेले जानकारी दिनुभयो । सहमति नभएर निर्वाचन समितिले आफ्नो कार्यक्रम गर्ने बताउँदै उहाँले २७ गते उपभोक्ताको नामावलीको सूचि बनाउने र १० बजेपछि उम्मेद्वारी दर्ता गराइने बताउनुभयो । २८ गते विहान १० बजेदेखि ३ बजेसम्म उम्मेदवारले नाम फिर्ता लिन सक्नेछन् भने सूचिमा २१ जना उम्मेदवार अर्थात आवश्यक उम्मेद्वार मात्र भए प्रमाणपत्र दिने नभए पुनः सूचना निकाली निर्वाचनका कार्यक्रम फेरी तय गरिने बताउनुभयो । निर्वाचन समिति सदस्यमा मुना धनञ्जय र पोषणराज सुबेदी रहनुभएको छ ।