गैंडाकोट/चीनको युआन प्रान्तबाट शुरु भएको कोरोना भाइरस (कोभिड–१९) ले यतिबेला विश्वलाई नै त्रसित बनाएको छ । जसका कारण विश्वकै अर्थतन्त्रले ठूलो क्षति व्यहोर्नु परेको अवस्था छ ।

नोभेल कोरोना भाइरस संक्रमण रोकथाम तथा नियन्त्रण पूर्व तयारी गर्ने उद्देश्यका साथ नेपाल सरकारले अहिले देशभरी नै लगडाउन गरेको यस अवस्थामा दैनिक रोजगारी गरेर जीवनयापन गरिरहेका विपन्न वर्गका परिवारहरुलाई विभिन्न क्षेत्रबाट सहयोगहरु आउने क्रम चलिरहेको छ ।

यसै सन्दर्भमा नवलपुरस्थित गैंडाकोट नगरपालिका वडा नं. ४ मा रहेका केही विपन्न परिवारहरुलाई क्याची टुर्स एण्ड ट्राभल्स प्रा.लि.ले आफ्नो सामाजिक उत्तरदायित्व वहन गर्दै राहत वितरण गरेको छ । टुर्स एण्ड ट्राभल्सले आफना ग्राहकहरुलाई मात्र सेवा प्रदान नगरी सामाजिक उत्तरदायित्वका कार्यमा अग्रणी भूमिका खेल्दै आएको छ ।

क्याची टुर्स एण्ड ट्राभल्स प्रा.लि.का अध्यक्ष राहुल कुमार सिंहको टोलीले उक्त स्थानमा पुगी ६ घरपरिवारका १८ जनालाई दाल, चामल, नुन, बिस्कुट, दालमोठ, चाउचाउ, भुजा, लुगा धुने र नुहाउने सावुन सहित डेङ्गुबाट बच्नको लागि आवश्यक तेल, धुप वितरण गरेको छ ।

उक्त अवसरमा क्याची टुर्स एण्ड ट्राभल्स प्रा.लि.का अध्यक्ष राहुल कुमार सिंहले आगामि दिनहरुमा समेत अन्य परिवारहरुलाई समेत राहत वितरण गर्ने र अस्पताल लगायतका अन्य सहयोगहरुको लागि क्याची टुर्स एण्ड ट्राभल्स प्रा.लि. हरदम सहयोग गर्न तयार रहेको बताउनुभयो ।  राहत वितरण कार्यक्रममा सहयोग गर्ने आशिष जोशी, रविन्द्र श्रेष्ठलगायतको क्याचीका अन्य सदस्यहरुको समेत सहभागी रहेको थियो ।