चितवन/ चितवन निर्वाचन क्षेत्र नम्बर २ का प्रतिनिधि सभा सदस्य उम्मेदवार अमृत थिङ तमाङले उद्योग र कलकारखा खोल्ने बिषय आफ्नो प्राथमिकतामा रहने बताएका छ्न् । लौरो चुनाव चिन्ह लिएर उम्मेदवार बनेका तामाङले देशमा बढ्दो बेरोजगारी हटाउनका लागि उद्योग र कलकारखा खोल्न आफूले जोड दिने बताए । उद्योग र कलकारखा स्थापनापछि रोजगारीका लागि ठूलो संख्यामा युवाहरु विदेशिने क्रम रोकिने उनको भनाइ छ ।
यस्तै युवाहरुलाई आत्मनिर्भर बनाउन रोजगारमूलक कार्यक्रमहरु सञ्चालन गर्ने पनि आफ्नो योजना रहेको उनले सुनाए । उनले भूमिहिन सुकुम्बासीलाई स्थायी बसोबासको व्यवस्था र हरेक क्षेत्रलाई समयानुसार डिजिटलाईज गर्न आफू लागी पर्ने बताए । नारायणी नदीलाई देशकै नमूना पर्यटकीयस्थलको रुपमा बिकास गर्ने योजना आफूसँग रहेको उनले बताए ।
डाँडा पाखा, खोलानाला, झरना, वन जङ्गललाई व्यवस्थित गरी पर्यटकीय स्थलको रुपमा बिकास गरेर देशको आर्थिक बिकासको योजना अघि सार्ने तामाङले बताए । जोखिमपूर्ण क्षेत्रमा काम गर्ने मजदुरको अनिवार्य बीमा, दुर्घटनामा ज्यान गुमाएकाको परिवारलाई रोजगारी, नि:शुल्क स्वास्थ्य शिक्षा र सडक पेटीमा बास बसेर जीविकोपार्जन गर्ने विपन्न गरीबलाई राज्यको पहुँचमा पुर्याउने उनले बताए । व्यवसाय गर्न चाहनेहरुलाई सहज तरिकाले ॠण उपलब्ध गराउने उनको प्रतिवद्धता छ ।
राजनीतिक प्रणालीमा सुधारको लागि पनि निरन्तर खबरदारी गर्ने उनले बताए । प्रत्यक्ष निर्वाचित कार्यकारी, डिजिटल निर्वाचन प्रणाली, प्रत्याह्वानको अधिकार, भ्रष्टचार अन्त्यका लागि डिजिटल प्रविधिको प्रयोग र राज्यको हरेक निकायमा समानुपातिक समावेशीकरण अनिवार्य गर्ने उनले बताए ।
दिर्घकालिन योजनासहित बिकास निर्माणकोक काम जनताको सेवा गर्नका लागि आफू चुनावी मैदानमा होमिएको उनको भनाइ छ । जनताको मन र मत जित्नेमा आफू विश्वस्त रहेको उनले बताए । उनले चितवनबासीलाई तिहारको शुभकामना समेत व्यक्त गरेका छन् । भरतपुर ११ भोजाड निवासी तामाङ निर्माण व्यवसायी तथा चलचित्रकर्मी हुन् ।
