रामनगर/नेपाल प्रहरी राजमार्ग सुरक्षा तथा ट्राफिक व्यवस्थापन कार्यालयले राजमार्गमा हुने बढ्दो सवारी दुर्घटनाको न्यूनिकरण गर्ने उद्देश्य अनुरुप बागमती प्रदेशका जिल्ला ट्राफिक प्रहरी कार्यालयहरुलाई गरेको १५ दिने अभियान सम्पन्न भएको छ ।
भाद्र २० गतेदेखि असोज ०३ गतेसम्म सञ्चालन गरिएको अभियानबाट सवारी चलाउदा मोवाइल फोन प्रयोग गर्ने ८७८ सवारी चालकहरुबाट ४ लाख ८० हजार ५ सय रुपैयाँ, ओभरलोड बोक्ने १७ सय ५ सवारी साधनबाट १८ लाख १० हजार रुपैयाँ, सिट क्षमता भन्दा बढी यात्रु वा मालसामान बोक्ने ६ सय ६२ जना सवारी साधनबाट रु ६ लाख २१ हजार ५ सय, सिट वेल्ट प्रयोग नगरी सवारी चलाउने ८ सय ६९ सवारी चालकबाट ४ लाख ७० हजार ५ सय रुपैयाँ, हेल्मेट प्रयोग नगरी सवारी साधन चलाउने १ सय ६५ जनाबाट १ लाख २७ हजार रुपैयाँ गरी ४ हजार २ सय ७९ सवारी चालकहरुबाट ३५ लाख ९ हजार ५ सय रुपैयाँ संकलन भएको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालयका प्रहरी नायव उपरीक्षक एवम् प्रवक्ता रामकृष्ण सापकोटाले बताउनुभयो ।

त्यसैगरी नेपाल प्रहरी राजमार्ग सुरक्षा तथा ट्राफिक व्यवस्थापन कार्यालयले सवारी दुर्घटना न्यूनिकरणका लागि असोज २ गतेदेखि ४ गतेसम्म सञ्चालन भएको ३ दिने अभियानको समेत समापन गरिएको छ । तीन दिने अभियान अन्तर्गत सवारी चालक अनुमती पत्र प्राप्त नगरी सवारी चलाउने २ सय ७० चालकहरुबाट २ लाख ७९ हजार रुपैयाँ संकलन गरिएको प्रहरी नायव उपरीक्षक एवम् प्रवक्ता रामकृष्ण सापकोटाले बताउनुभयो ।

यसैबीच नेपाल प्रहरी राजमार्ग सुरक्षा तथा ट्राफिक व्यवस्थापन कार्यालयले सर्वसाधारणहरुको लागि चाडपर्व लक्षित सवारी दुर्घटना न्यूनीकरण तथा ट्राफिक व्यवस्थापन सम्बन्धि योजनाहरु ल्याएको छ ।
ट्राफिक व्यवस्थापन सम्बन्धि योजना अन्तर्गत बसपार्क एरिया तथा यात्रुहरुको चाप हुने स्थानको पहिचान गरी यात्रुहरुको सहजताको लागि यात्रु सहायता कक्ष निर्माण गर्ने, दिवा तथा रात्री समयमा मादक पदार्थ सेवन गरी सवारी चलाउने चालक माथि कारवाही गर्न नियमित चेकिङ्गको व्यवस्था मिलाउने, राडर गन÷लिडर गनको प्रयोग गरी अस्वस्थ प्रतिस्पर्धा गरी ओभर स्पिडमा सवारी चलाउन रोक लगाउने, आरक्षण सिटको सुनिश्चितता गर्ने, यात्रुसँग बढी भाडा लिई सवारी चलाउनेलाई बढी भाडा फिर्ता गर्न लगाई अधिकतम कारवाही गर्ने, क्षमता भन्दा बढी यात्रु वा मालसामान राखी सवारी साधन सञ्चालन गरेमा अधिकतम कारवाही गर्ने, परियोजन विपरीत (चाडपर्वको अवसरमा यात्रु बाहक सवारी साधनमा चौपाया ढुवानी) सञ्चालन हुने सवारी साधन नियन्त्रणका लागि विशेष चेकिङ्ग गर्ने लगायतका रहेका छन् ।