भरतपुर/भरतपुर महानगरले भाषा,साहित्य,कला,संस्कृतिको उत्थानका लागि प्राथमिकता दिएको छ । महानगरले यसको लागि छुट्टै प्रतिष्ठान गठन गरी विभिन्न गतिविधि बढाएको छ । गत वर्षको चैतमा मात्रै स्वरूप पाएको प्रतिष्ठानले राष्ट्रिय प्रतिभाहरूको जयन्तीमा कार्यक्रम सञ्चालन गर्दै आएको छ । गत असारमा भानु जयन्तीमा सहकार्य गरेको प्रतिष्ठानले आज मात्रै मोती जयन्तीको अवसरमा समस्यापूर्ति काव्य गोष्ठी सम्पन्न गरेको छ । गोष्ठीको उदघाटन गर्दै प्रमुख अतिथि महानगरका उपप्रमुख तथा प्राज्ञ सभा सदस्य चित्रसेन अधिकारीले युवाकवि मोतीराम भट्टजस्ता हजारौं प्रतिभा हाम्रा वरपर हुन सक्छन्; तिनलाई प्रोत्साहन गर्न प्रज्ञा-प्रतिष्ठान लागिपर्ने बताउनु भयो । अधिकारीले साहित्यकारहरू समाजका द्रष्टा भएकाले विकास निर्माण र राजनीतिमा लाग्नेहरूका लागि यिनका साहित्यहरू प्रेरणादायी भएको बताउनु भयो ।

कार्यक्रममा प्राज्ञ परिषद् सदस्य केदारनाथ खनालले मोतीराम भट्टको बहुआयामिक व्यक्तित्व प्रकाश पार्नु भएको थियोे । कार्यक्रममा अर्का परिषद् सदस्य प्रकाश चापागाईंले स्वागत मन्तव्य व्यक्त गर्दै प्रज्ञाप्रतिष्ठान गठन प्रश्चात गरिएको पहिलो एकल कार्यक्रम नै मोतीराम भट्टप्रति समर्पित गरिनु प्रशंसनीय रहेको बताउनु भयो । उदघाटन समारोहमा मन्तव्य राख्दै नगर शिक्षा अधिकारी महेन्द्रप्रसाद पौडेलले प्रतिभाहरूबीच आपसी प्रतिस्पर्धाका माध्यमबाट उत्कृष्ट रचनाको अपेक्षा गरिएको बताउनु भयो । प्रतिष्ठानले १५७औँ मोतीराम जयन्तीको अवसर पारेर शनिबार महासंघको सभाहलमा काव्यगोष्ठी गरेको हो । प्रतिष्ठानका उपकुलपति इन्द्रप्रसाद रेग्मीको अध्यक्षतामा सम्पन्न `अहङ्कारको आयु लामो हुँदैन´ शीर्षकमा आयोजित प्रतियोगितात्मक समस्यापूर्ति काव्यगोष्ठीमा १९ जनाले रचना वाचन गरेका थिए । प्रतियोगितामा कुल ४२ जनाका रचना प्राप्त भएकोमा छनोट समितिले २० जनालाई रचना वाचनको मौका दिइएको कार्यक्रम संयोजक विष्णुदेवी तिवारी उषाले जानकारी दिनु भयो । प्रतियोगितात्मक काव्यगोष्ठीमा गोरखाका नारायणप्रसाद पोखरेल प्रथम भएका छन् भने देवघाटका कृष्णशरण उपाध्याय द्वितीय, ओमप्रसाद खरेल तृतीय भए भने प्रोत्साहन पुरस्कार चेतना वाग्ले र प्रभास घिमिरेले प्राप्त गरे । पुरस्कृत कविहरूलाई नगद, सम्मानपत्र र दोसल्लासहित सम्मान गरिएको थियो । प्रतियोगितामा प्रथम हुनेले १० हजार रुपैयाँ, द्वितीयले ८ हजार, तृतीयले ६ हजार र प्रोत्साहनलाई ४/४ हजार नगद रुपैयाँसहित सम्मान गरिएको प्रज्ञा प्रतिष्ठानका सदस्य सचिव बालकृष्ण थपलियाले बताए । प्रतियोगिताको निर्णायकहरूमा डा. धनेश्वर भट्टराई, केशवराज आमोदी र प्रभा मरहट्ठा कोइराला रहेका थिए ।