भरतपुर/युवा तथा खेलकुद मन्त्रालयले चितवनमा खेलकुदमा प्रतिबन्धित औषधि प्रयोग एवं बिधि विरुद्ध गोष्ठी कार्यक्रम बुधबार सम्पन्न गरेको छ । चितवनका खेलाडिलाइ लक्ष्यित गरि गरिएको कार्यक्रममा भरतपुर महानगर उप प्रमुख चित्रसेन अधिकारीले अन्य बिकासका काम सग सगै महानगरले खेलकुदको बिकासमा सक्दो सहयोग गर्ने बताउनु भयो ।

महानगरले युवा तथा खेलकुद समिति नै बनाएर निरन्तर रुपमा काम गरिरहेको उप प्रमुख भन्नू भयो । उपमेयर अधिकारीले खेलाडीलाई स्वच्छ खेलकुदका गतिविधिमा लाग्न प्रोत्साहित गर्नुपर्ने बताउनुभयो । उहाँले नियतवस वा भूलबस प्रतिबन्धित औषधि प्रयोग गर्ने अवस्था आउन नदिन अभियान चलाउनुपर्नेमा जोड दिनुभयो । कार्यक्रममा बोल्दै मन्त्रालयका सचिव डाक्टर दामोदर रेग्मीले देशभरका खेलाडीहरुलाई प्रतिबन्धि औषधि प्रयोग नगर्न देशव्यापी प्रशिक्षण अभियान चलाइएको बताउनुभयो । “प्रतिबन्धित औषधि प्रयोग गर्दा स्वयम् खेलाडी र देशकै प्रतिष्ठा गुम्ने खतरा हुन्छ”, उहाँले भन्नुभयो, “खेलाडी, प्रशिक्षक, खेलका सरोकारवाला संस्थाहरुलाई यस्ता गतिविधि नगर्न सचेत गराउन थालेका छौँ ।” स्वच्छ खेल बनाउन विगत २ वर्षदेखि अभियान चलाइएको बताउनुभयो ।

यो वर्ष ७ सय जना खेलाडी, प्रशिक्षक तथा खेलकुद क्षेत्रका संस्थाहरुलाई तालिम दिने लक्ष्य रहेको बताउनुभयो । “प्रतिबन्धित औषधिहरुको नेपालीकरण गरेर सूचीनै सार्वजनिक गर्ने योजनामा छौँ”, उहाँले भन्नुभयो, “खेलाडी धेरै भएका क्षेत्रमा अभियान चलाइसक्यौँ, अब केही महिनाभित्रै खेलाडी कम भएका क्षेत्रमा पनि अभियान चलाउनेछौँ ।” खेलाडीमा अप्राकृतिक रूपमा शक्ति बढाउन प्रतिबन्धित औषधि प्रयोग गर्नेक्रम बढेको छ । अर्थोपेडिक्स तथा ट्रमा सर्जन डाक्टर ज्ञानेन्द्र शाहले खेलाडीले प्रतिबन्धित औषधि आफ्नो साथमा राख्दा या प्रयोग गर्दा, डोपिङ टेस्टमा बाधा पुर्‍याउँदा र आफू कहाँ छु भन्नेबारे जानकारी नदिँदा पनि डोपिङमा पर्ने बताउनुभयो । खेलाडीले सफलताको आशा, ख्यातिसँगै आर्थिक समृद्धि हासिल गर्न डोपिङ गर्ने गरेका छन् । प्रतिबन्धित औषधि प्रयोग गरेको दुई वर्षसम्म पनि डोपिङ टेस्ट पोजिटिभ आउने भएकाले खेलाडीको करियरमा दाग लाग्न नदिन बेलैमा सतर्क बन्नुपर्नेमा जोड दिनुभयो । अन्र्तक्रियामा चितवन, नवलपुरका विभिन्न विधाका खेलाडी, प्रशिक्षक, संस्थाका ४० बढीको सहभागिता रहेको थियो । कार्यक्रममा जिल्ला खेलकुद विकास समिति चितवनका अध्यक्ष उत्तम गुरुङ, कार्यालय सचिव रामजी ढकाल लगायतले मन्तव्य राख्नुभएको थियो ।